५, पौष २०७८ कैलाली । कैलालीको जानकी गाउँपालिका वडा नम्बर ९ मा शनिबार जंगलभित्र युवकको विभत्स हत्या गरेको आरोपमा शंकास्पद एक जनालाई प्रहरीले पक्राउ गरेको छ ।
प्रहरीले गाउँपालिका वडा नम्बर ९ का २५ वर्षीय अर्जुन दासको हत्या गरेको आरोपमा लम्की टीकापुर क्षेत्रबाट एक जना शंकास्पदलाई पक्राउ गरेको हो ।
यद्धपी पक्राउ परेकाको नाम भने प्रहरीले सार्वजनिक गरेको छैन । वडा नम्बर ९ कै अमरावती सामुदायिक वनमा रुखमा बाँधेर टाउको छिनालेको अवस्थामा दासको शव फेला परेको थियो ।
दासको हत्यापछि उनका आफन्त र स्थानीयले हत्यारालाई पक्राउ नगर्दा सम्म शव उठाउन दिएका छैनन् ।
उनीहरुले शव फेला परेको ठाउँलाई घेराउ गरेका छन् । घटनापछिको फोन रेकर्ड पनि प्रहरीले फेला पारेको छ ।
हत्यापछि दुई युवकबीच भएको फोन रेकर्ड बाहिरिएको हो । जिल्ला प्रहरी कार्यालउ कैलालीका एसपी विश्वप्रसाद अधिकारीका अनुसार फोन रेकर्ड सुन्दा आपसी विवादमा हत्या भएको देखिन्छ । फोन रेकर्डकै आधारमा प्रहरीले अनुसन्धानलाई अगाडी बढाएको छ ।
